Informatat dhe resurset kundër korrupsionit

  1. Historia e SHBA-ve dhe Kosovës
  2. Çështjet aktuale
  3. Informatat dhe resurset kundër korrupsionit
Anti-Corruption

Në mbarë botën, korrupsioni dobëson rritjen ekonomike, pengon zhvillimin, destabilizon qeveritë, dëmton demokracinë dhe ofron hapje për grupe të rrezikshme si kriminelët, trafikantët dhe terroristët. Siç ka thënë Sekretari Kerry, korrupsioni “e shkatërron tërë strukturën e shoqërisë”. Departamenti i Shtetit i SHBA-së e ka bërë luftën kundër korrupsionit prioritet të sigurisë kombëtare dhe punon në mbarë botën për ta parandaluar korrupsionin, nxitur llogaridhënien dhe fuqizuar reformatorët.

Ambasadori Delawie theksoi menjëherë pas ardhjes së tij në Kosovë, por edhe shumë herë të tjera që nga ajo kohë, se një prej prioriteteve të tij kryesore gjatë mandatit të tij do të jetë lufta kundër korrupsionit: “Shtetet e Bashkuara dhe Ambasada jonë jemi të gatshëm t’ju ndihmojmë në përpjekjet tuaja për ta luftuar korrupsionin…. Ky është një investim nga populli amerikan në të ardhmen e Kosovës. Kam ndërmend ta vazhdoj këtë investim dhe të punoj me të gjitha institucionet e Kosovës për të ndihmuar në betejën për përmirësimin e sundimit të ligjit në Kosovë.”

Ambasada Amerikane në Prishtinë është e vendosur të mos ketë asnjë bashkëpunim me zyrtarët që janë nën hetim zyrtar për korrupsion, ta ndërpresë ndihmën për zyrtarët ose agjencitë e korruptuara dhe ta ndalojë udhëtimin për individët e përfshirë në korrupsion.

Shumë sektorë të Ambasadës Amerikane në Prishtinë kanë një agjendë aktive të përqendruar në këtë çështje kritike. Ata kanë financuar projekte dhe trajnime të shumta për t’i mbështetur institucionet e Kosovës, shoqërinë civile dhe sektorin privat për ta inkurajuar një qasje më të koordinuar për t’u marrë me korrupsionin dhe për të siguruar që agjencitë qeveritare mbeten të angazhuara në mënyrë aktive. Projekte specifike janë të përqendruara në e-qeverisje, forcim të sistemit gjyqësor dhe inkurajim të qytetarëve për ta raportuar korrupsionin.