KD: Z. Ambasador do të doja të filloja me demokracinë, më saktësisht me situatën me të cilën disi jemi konfrontuar gjatë javës së kaluar, me qorrsokakun e fundit në të cilin kemi hyrë për shkak të hedhjes së vezëve dhe rezistencës së opozitës. Çfarë na thotë kjo, sipas këndvështrimit tuaj, lidhur me marrëdhëniet politike në Kosovë, ndërmjet partive, dhe gjendjen e demokracisë në fakt?
Delawie: E po kjo është pyetje e mirë apo vend i mirë për t’ia nisur, mendoj. Le ta mbajmë mend se qeveria dhe parlamenti kanë rezultuar nga zgjedhjet e vitit 2014, të cilat gjithandej, përfshirë edhe nga qeveria ime, janë konsideruar si fer dhe të drejta dhe në këto zgjedhje po ashtu kanë marrë pjesë qytetarët nga i gjithë territori i Kosovës, që mendoj se është me shumë rëndësi. Partitë më pas bashkëpunuan me njëra-tjetrën, në përputhje me Kushtetutën e Kosovës, për ta formuar qeverinë. Përkundër fjalëve të vazhdueshme për të kundërtën, më duhet t’ju them se qeveria e Amerikës nuk e ka favorizuar asnjë parti politike karshi një tjetre gjatë këtij procesi. Prandaj, Shtetet e Bashkuara të Amerikës i mbështesin proceset dhe institucionet demokratike. Populli i Kosovës e zgjodhi qeverinë dhe ne punojmë me atë qeveri që populli e zgjedh. E kam të vështirë të shoh se si hedhja e vezëve apo e çfarëdo gjëje tjetër përveç fjalëve në sallën e Kuvendit e forcon demokracinë në Kosovë apo i kontribuon përmbushjes së synimeve më të gjera të saj. Mendoj se është me rëndësi që të mbahen mend këto synime më të gjera dhe se si veprimet e njerëzve iu kontribuojnë atyre. Për shembull, Shtetet e Bashkuara të Amerikës duan që ta shohin Kosovën duke zënë vendin e saj të merituar në skenën botërore, të bëhet anëtare e të gjitha institucionet kyçe evropiane dhe këto synime ndikojnë në gjithçka që ne bëjmë, jo vetëm tek unë dhe ekipi im këtu në ambasadë. Siç tha presidenti Obama gjatë kësaj jave në New York, më duhet ta lexoj këtë: “Unë e kuptoj se demokracia është frustruese. Demokracia në SHBA është padyshim jo e përkryer, herë pas here madje mund të jetë edhe jofunksionale”, por ai ceku se është pikërisht demokracia ajo që ia ka mundësuar SHBA-së që ta zhvillojë një ekonomi dinamike dhe që të lulëzojë si shtet shumetnik.
KD: Po, ambasador, padyshim se të gjithë do të pajtoheshim me këtë, por puna është se cilat janë rrënjët e një situate kaq të tensionuar që kemi përjetuar së fundmi dhe pse shumëkush në shoqëri, jo vetëm opozita, e konsideron se mungesa e mëhershme e debatimit për çështjet ka hapur rrugën që konfrontimet të arrijnë në këtë pikë vlimi, duke nënkuptuar me këtë se pozita, qeveria nuk është lodhur shumë që ti diskutojë çështjet para se në fakt të pajtohet me to në Bruksel, dhe ne po flasim për marrëveshje këtu pas nënshkrimit të tyre. A mund të ndodh që opozita ndjen tani se nuk i kanë mbetur më fjalë për të hedhur?
Delawie: Më lejoni që t’ia filloj duke thënë se Parlamenti është një institucion i rëndësishëm dhe është me rëndësi që të funksionojë për të mirën e shtetit. Për këtë duhet punë e mundimshme dhe kompromis, gjë që jo gjithmonë është e lehtë. Aktualisht e di se janë 23 ligje që po presin leximin e parë apo të dytë në Kuvend. Janë këto ligje të rëndësishme, siç është njëri që do të krijonte një fond garantues për kredi, të cilin e kemi mbështetur, sepse kur ky ligj të miratohet, ai do të ketë efekt jashtëzakonisht të madh pozitiv për Kosovën dhe ekonominë e saj. Dhe me të vërtetë nuk pajtohem me premisën e pyetjes suaj. Gjatë verës ka pasur bukur mjaft debat në Kuvend. E kuptoj se opozita nuk e ka përmbushur synimin e vet legjislativ, por kjo nuk do të thotë se nuk ka pasur debat kuptimplotë. Në demokraci, politikat përcaktohen nga partia apo partitë që formojnë koalicionin e shumicës. Në përgjithësi, atyre që nuk iu pëlqejnë politikat e koalicionit qeverisës duhet të punojnë për t’ua shpjeguar qëndrimet e tyre elektoratit dhe të marrin shumicën e votave në zgjedhjet e ardhshme të 2018-ës. Në atë pikë ata do të ishin në pozitë që të përcaktojnë vetë agjendat atëherë.
KD: Pra ju po thoni se nuk ka gjë që opozita mund të bëjë nëse qeveria i ka votat për të kaluar çfarëdo marrëveshje apo ligj?
Delawie: Opozita ka shumë mjete për të bërë që zëri i saj të dëgjohet. Është detyrë e opozitës që të përfshihet në një debat kuptimplotë dhe të përdorë mjetet që ia mundëson demokracia që zëri i saj të dëgjohet. Ka qenë shumë e vështirë që të injorohet zëri i opozitës gjatë disa javëve të fundit. Unë jam në Kosovë tashmë vetëm gjashtë javë dhe gjatë kësaj kohe parlamenti ka tentuar që të mbajë seancë dy herë, mendoj. Këto seanca do të ofronin një mundësi të qartë për diskutimin e çështjeve të diskutueshme dhe për miratimin e legjislacioneve të domosdoshme. E kuptoj se në shqip e keni një thënie që do të thotë se vetëm pse po humbni, nuk duhet ta prishni lojën. Kjo është veçanërisht e vërtetë në politikë, ku të gjithë e duan atë që është më e mira për vendin e tyre, edhe në rast se nuk pajtohen se cila është ajo më e mira.
KD: Në këtë periudhë kohore ne jemi duke përjetuar këtë situatë para së gjithash për shkak të marrëveshjeve të arritura në Bruksel, dhe në mesin e tyre posaçërisht dhe më së shumti për shkak të marrëveshjes për Asociacionin e komunave me shumicë serbe. Esenca këtu duket të jetë ajo nëse ky është një zhvillim pozitiv apo jo dhe aq pozitiv për shtetin. Dhe si përfaqësues i Shteteve të Bashkuara të Amerikës, e cila i ka mbështetur marrëveshjet, cilat mendoni janë përfitimet e vërteta të këtyre marrëveshjeve dhe veçanërisht të marrëveshjes për asociacionin e komunave serbe?
Delawie: Së pari, e di se gazeta juaj ka qëndrime editoriale kundër dialogut dhe duhet thjeshtë të mos pajtohemi për këtë. Politika parësore amerikane në rajon është që të promovojë një Evropë të tërë, të lirë dhe në paqe. Nuk do ta arrijmë këtë synim pa i përmirësuar marrëdhëniet ndërmjet Kosovës dhe Serbisë dhe dialogu i prirë prej BE-së është mënyra e vetme që unë e shoh se mund të arrijmë deri aty. SHBA-ja e mbështet fuqishëm dialogun dhe marrëveshjet e deritanishme të arritura ndërmjet Kosovës dhe Serbisë, përfshirë këtu edhe ato të nënshkruara muajin e kaluar, në gusht. Unë mendoj se progresi i arritur falë dialogut është i pamohueshëm, por ky është opinioni im. Ish-sekretarja amerikane e Shtetit, Hillary Clinton, thoshte se ne të gjithë kemi të drejtë t’i kemi opinionet tona, por jo të gjithë kemi të drejtën mbi faktet. Prandaj le të flasim disa minuta për faktet. Më 2011, kur Kosova u përpoq t’i mbledhte tarifat doganore në veri, njerëzit vendosën barrikada atje. Dialogu hapi rrugën që në dhjetor të vitit 2013 atje të fillonte mbledhja e tarifave doganore pa dhunë. Zgjedhjet e fundit komunale përfshinë, për të parën herë deri më tash, të gjithë territorin e Kosovës. Falë këtyre zgjedhjeve ju tani e keni një pjesë të shtetit që operon plotësisht nën ligjet e Kosovës. Këto zgjedhje hapën rrugën për zgjedhjet parlamentare të vitit 2014, në të cilat u zgjodhën serbë nga veriu i Kosovës, të cilët janë betuar se do ta mbrojnë Kushtetutën e Kosovës dhe të cilët marrin pjesë në Kuvendin e Kosovës. E të mos flasim për përfitimet e prekshme, si kodi ndërkombëtar i telefonisëqë rezultoi nga marrëveshjet e verës. Dhe shikuar edhe më gjerësisht dhe që të dal në thelbin e pikëpamjes sime për sa i përket rëndësisë së përmirësimit të marrëdhënieve ndërmjet Kosovës dhe Serbisë: dialogu i vazhdueshëm ndërmjet këtyre dy shteteve do të ndihmojë në sigurimin e stabilitetit dhe të promovojë investime ndërkombëtare në rajon. Dialogu ndërmjetësohet nga përfaqësuesja e lartë e BE-së, Federica Mogherini… ajo ka shumë punë të rëndësishme për të bërë, por sërish ajo kalon shumë kohë në këtë. Nuk shoh se si Kosova mund të shënojë përparim drejt integrimit në institucionet euro-atlantike nëse nuk ka dialog.
KD: Më lejoni vetëm të nënvizoj se përsa i përket politikave tona redaktoriale ne jo se jemi kundër dialogut si mjet për të arritur marrëveshje dhe për normalizimin e marrëdhënieve ndërmjet Kosovës dhe Serbisë, por ne gjithnjë kemi qenë kritikë të asaj se si ky dialog i është shitur, le të themi kështu, popullit tonë dhe kemi qenë kundër mënyrës se si është zhvilluar dialogu. Sidoqoftë, unë nuk po ju pyes posaçërisht për marrëveshjet e tjera, por për marrëveshjen konkrete për Asociacionin e komunave serbe. Ka zëra, madje edhe jashtë Kosovës, siç është Daniel Serwer nga SHBA-ja, i cili alarmoi se ekziston një lloj rreziku se kjo marrëveshje mund të çojë drejt ndarjeve etnike ndërmjet serbëve dhe shqiptarëve, veçanërisht në ato rajone ku asociacioni do të funksionojë. Prandaj, cilat janë garancitë, kush mund të thotë se diçka e tillë nuk mund të ndodhë, si mund ta parandalojmë që kjo të shndërrohet në një lloj zgjidhjeje që do të mund të na çojë drejt më shumë ndasive ndërmjet serbëve pakicë dhe shqiptarëve shumicë?
Delawie: Shikoni, e kuptoj se kjo është e vështirë. E kuptoj se për gjithçka do të nevojitet ende kohë. E di se njerëzit janë të brengosur; i lexoj gazetat, tuajën dhe të tjerat. Por për sa i përket marrëveshjes për asociacionin e komunave serbe: e inkurajoj këdo që ka shqetësime për këtë që ta lexojë dokumentin që është në ueb faqen e BE-së. Është 4-5 faqe i gjatë, gjuha është e thjeshtë, nuk duhet të jeni avokat për ta kuptuar. Për ne është e qartë se kjo marrëveshje i respekton plotësisht ligjet e Kosovës dhe Kushtetutën e Kosovës. Lexojeni marrëveshjen. Nuk ka asnjë indikacion në ujdi se do të krijohet ndonjë shtresë e tretë qeverisëse apo se do të ketë kompetenca ekzekutive, apo se ajo paraqet shkelje të Kushtetutës së Kosovës. Ju më pyetët për garancitë. Një prej etërve tanë themelues ka thënë se nuk ka garanci të tjera në jetë, përveç vdekjes dhe taksave. Por unë dua të jem i qartë: Shtetet e Bashkuara të Amerikës i mbështesin plotësisht marrëveshjen e asociacionit dhe SHBA-ja është miku më i fuqishëm i Kosovës, mbrojtësi më i madh i saj. SHBA-ja e mbështet Kosovën sovrane dhe nëse nuk më besoni, vozitni një kilometër më tej dhe do të shihni përgjatë shtegut punimet e ndërtimit të ambasadës tonë të re, e cila do të jetë shumë e bukur. Po investojmë shumë në atë ambasadë. Ne nuk do ta mbështesnim një marrëveshje që do të ndërhynte në sovranitetin dhe integritetin territorial të Kosovës. Tani, qeveria amerikane, në bashkëpunim me miqtë tanë në Bruksel, mbetet fuqimisht e angazhuar në mbështetjen për zbatimin e dialogut dhe të përpjekjeve për integrim. Do të vazhdojmë ta ndjekim këtë proces nga afër dhe jemi të interesuar që qeveria e Kosovës të arrijë përparim. Ne shqetësohemi për atë çfarë ndodh në rajon. Ne kemi qenë të pranishëm në zgjidhjen edhe të konflikteve të tjera në Ballkan dhe kemi mësuar nga ajo përvojë.
KD: E përmendët vdekjen dhe taksat, gjë e cila më shpie tek një çështje tjetër, për të cilën dua të diskutoj. Pagesa e taksave është një formë e llogaridhënies përballë shtetit. Ka shumë çështje, për të cilat qytetarët janë duke shtruar pyetje në lidhje me zhvillimet aktuale politike dhe llogaridhënien për to. Njëra nga mënyrat se si ishte sqaruar domosdoshmëria apo nevoja për krijimin e Gjykatës Speciale ishte duke thënë gjatë debatit parlamentar se pasi që kemi dështuar për të siguruar drejtësi dhe për të adresuar akuzat serioze për krime lufte dhe krimet e natyrave të ndryshme menjëherë pas luftës, lindi domosdoshmëria për një gjykatë speciale që do ta bëjë një gjë të tillë, gjë që nënkupton se ka probleme me sundimin e ligjit këtu. Por, ne nuk kemi parë llogaridhënie për këtë nga politikanët. As nga ata që po e drejtojnë tani qeverinë, as nga ata që drejtuan qeveritë e mëparshme gjatë pesëmbëdhjetë viteve të kaluara. Pra, pyetja është, a do të përgjigjet dikush ndonjëherë për keqpërdorim të mundshëm apo përdorim joadekuat të mandatit, të cilin e ka marrë nga votuesit e këtij shtetit?
Delawie: E kam thënë publikisht shumë herë se bashkëpunimi me qeverinë për forcimin e sundimit të ligjit është një nga prioritetet e mia kryesore në Kosovë. Ka shumë për t’u bërë dhe ne do të vazhdojmë ta japim kontributin tonë. SHBA-ja nuk vazhdon të shpenzojë para në gjëra në të cilat nuk besojmë se do të funksionojnë, pra ne besojmë se jemi duke bërë një investim të rëndësishëm dhe që reformat mund të bëhen. Kam vizituar projektet në sektorin e sundimit të ligjit në vendet si Gjilani dhe Ferizaji dhe po e shoh se po arrihet progres. E di që përceptimi publik për gjyqësorin është i ulët. Mendoj se ne, bashkësia ndërkombëtare, qytetarët e Kosovës dhe liderët e saj e kuptojnë se sektori i sundimit të ligjit në Kosovë është përballur dhe vazhdon të përballet me sfida të shumta. Çështja e llogaridhënies është punë e vazhdueshme. Të mos harrojmë se në rastin e Kosovës është dashur të niset nga e para dhe të ndërtohen sisteme të reja, duke stabilizuar dhe rindërtuar në të njëjtën kohë një shtet të shkatërruar nga lufta. Duhet shumë kohë dhe përpjekje për ta ndërtuar një sistem të fortë dhe efektiv gjyqësor, i cili mund ta fitojë respektin e qytetarëve të vendit. Pra, ndonëse duhet t’i kuptojmë dhe të punojmë për t’i tejkaluar mangësitë, nuk duhet të harrojmë se Kosova ka bërë një rrugë të gjatë përpara. Ambasada jonë ka mbështetur një numër nismash për mbështetjen dhe përforcimin e sundimit të ligjit dhe gjyqësorit këtu në Kosovë. Vitin e kaluar kemi shpenzuar 15 milionë dollarë për ndjekjen e këtyre synimeve. Do të jap disa shembuj: Programet tona të Departamentit të Drejtësisë janë tërësisht të përkushtuara në mbështetjen dhe përforcimin e sektorit të sundimit të ligjit dhe drejtësisë në Kosovë. Ne kemi dërguar kuadro të gjyqësorit në Universitetin Wake Forest në SHBA për të ndjekur programe arsimore trajnimi për të ndihmuar në rritjen e shkathtësive të tyre. Më 21 shtator kam marrë pjesë në inaugurimin e ndërtesës së re të prokurosisë themelore në Gjilan. USAID-i ka ndihmuar në renovimin e objektit të Gjykatës Themelore në po atë qytet disa vjet më parë. Në Ferizaj kam dëgjuar kryetarin e gjykatës duke thënë se si Gjykata Themelore po e përdor infrastrukturën e siguruar nga USAID-i, pra kompjuterët, trajnimin, për të reduktuar numrin e madh të lëndëve të mbetura dhe për ta bërë statusin e lëndëve më transparent për publikun. E kuptoj se njerëzit i presin me padurim ndryshimet tani. Edhe unë mezi pres. Më vjen mirë që njerëzit presin me padurim, pasi që një gjë e tillë na shtyn neve në qeveri që të punojmë më shumë për t’i përmbushur qëllimet tona.
KD: Nuk mendoj se ka ndonjë njeri që nuk është i vetëdijshëm për kontributin e SHBA-së gjatë dhe pas luftës këtu, posaçërisht gjatë këtyre viteve me USAID-in dhe gjithë ato para që janë investuar këtu në përmirësimin, jo vetëm të infrastrukturës së gjyqësorit dhe sundimin të ligjit. Por, problemi duket të jetë se njerëzit nuk po shohin rezultate të barazvlefshme me atë që është investuar, jo vetëm në aspektin e ndihmës financiare, por edhe në aspektin politik. Po flasim për korrupsionin, luftimin e krimit të organizuar dhe këto vazhdojnë të jenë çështje dominuese sa herë që lexojmë ndonjë raport për Kosovën. Pesëmbëdhjetë vjet pas luftës ne do duhej të ishim në pikën në të cilën, shembull, Gjermania ishte diku në vitin 1960, nëse numërohen vitet. Që do të thotë, do të duhej të kishim arritur progres më të madh, posaçërisht në luftimin e korrupsionit…
Delawie: Ju kuptoj dhe mendoj se të gjithë e dimë që korrupsioni mbetet një nga pengesat kryesore për përparimin e Kosovës në rrugën e saj drejt Evropës. Efektet e korrupsionit, ju e dini pasi që jetoni këtu, i prekin të gjitha nivelet e shoqërisë. Nuk është roli im që të jap gjykim apo të karakterizoj veprimet e politikanëve të zgjedhur të Kosovës ose opozitës. Ajo është puna e votuesve. Por mund të them se pasojat që i ka një shoqëri nga korrupsioni shkojnë shumë përtej shumës së një ryshfeti. Korrupsioni i kushton Kosovës me vende pune, të cilat i nevojiten për t’i mbajtur të rinjtë këtu dhe për të ndihmuar në ndërtimin e shtetit më të mirë. Raporti i Bankës Botërore për vitin 2013 i indikatorëve globalë të qeverisjes për kontrollin e korrupsionit e vë Kosovën në grupin e vendeve të fundit, të tretin, me 31%. Ky është problem i madh. Ky nuk është vend i mirë për të qenë. Por, e dini, nuk ka shkop magjik për ta rregulluar këtë gjë. Do të duhet shumë punë në institucione, infrastrukturë, trajnim dhe kulturë, ashtu si edhe në gjëra tjera për ta pasur këtë problem nën kontroll. SHBA-ja dhe bashkësia ndërkombëtare vazhdojnë të investojnë shumë në sigurimin e ndihmës teknike për ta luftuar problemin. Për shembull, kemi punuar për të siguruar trajtim të drejtë për ofertuesit në projektet e prokurimit publik. Kemi trajnuar policë, prokurorë, gjyqtarë dhe siç kam thënë javën e kaluar në takimin e Këshillit Nacional kundër Korrupsionit, çelës i luftimit të korrupsionit është një sistem në të cilin agjencitë punojnë së bashku, ku policia, prokurorët dhe gjyqësori punojnë së bashku për ta zbatuar drejtësinë dhe ku njerëzit e kuptojnë se nëse shohin rast të korrupsionit, ata do të mund ta raportojnë atë dhe diçka do të ndërmerret. Në fillim të këtij muaji e kam nënshkruar ndryshimin e marrëveshjes bilaterale për grante për zhvillimin e objektivave, e cila dëshmon zotimin e SHBA-së për të siguruar 25 milionë dollarë për të mbështetur sundimin e ligjit, qeverisjen, si dhe për promovimin e investimeve dhe punësimit në Kosovë. Ne mundemi, ne do të ndihmojmë, por institucionet e Kosovës janë ato që në fund të fundit janë përgjegjëse për të siguruar që invidivët e korruptuar japin llogari. Vazhdimisht kemi bërë thirrje që zyrtarët e akuzuar për korrupsion nga prokuria të suspendohen deri në zgjidhjen e rasteve të tyre…
KD: Cila ka qenë përgjigja, nëse ka pasur ndonjë përgjigje, ndaj kësaj thirrjeje? Mendoj, ka ende zyrtarë që nuk janë suspenduar, e madje as që po gjykohen.
Delawie: Kjo qeveri ka filluar ta bëjë një gjë të tillë dhe duket e përkushtuar për pastrimin e radhëve të veta, duke larguar zyrtarë të akuzuar. Nuk i kam emrat e këtyre njerëzve, pasi që kam ardhur këtu vetëm disa javë më parë, por ky është një faktor kyç dhe do të vazhdojë të jetë i rëndësishëm për ne.
KD: Keni përmendur dy herë se njerëzit e kanë mundësinë që të vendosin vetë kur të votojnë dhe si e dini, këtu është i zakonshëm mandati katërvjeçar. Si mund të jetojnë njerëzit gjatë periudhës midis dy palë zgjedhjeve kur janë të pakënaqur, posaçërisht kur flasim për gjendjen ekonomike dhe humbjen e iluzioneve me mungesën e progresit drejt një shoqërie më të drejtë dhe më të begatshme? Jemi duke pasur pengesa të mëdha ekonomike dhe nuk po shohim se po ndërmerren masa, apo nuk po i ndjejmë efektet e atyre masave nga qeveria dhe institucionet e tjera…
Delawie: Promovimi i rritjes ekonomike dhe investimi në sektorin privat është një nga prioritetet kryesore të SHBA-së në Kosovë dhe, si e thoni, është çelës për shëndetin afatgjatë ekonomik të Kosovës dhe mirëqenien e qytetarëve të saj. Ka pasur njëfarë progresi në këtë aspekt. Sapo kam lexuar raportin e Bankës Botërore të vitit 2015 të indikatorëve për bërjen e biznesit dhe aty Kosova është ngritur nga vendi i 81-të në atë të 75-të krahasuar me vitin paraprak. Kjo është mirë, nuk është shkëlqyeshëm, por është mirë. Zhvillimi ekonomik i Kosovës është një nga prioritetet e mia kryesore. Ne kemi disa programe për këtë fushë, por ka pengesa. Kosova duhet të bëjë më shumë për ta përmirësuar aftësinë e tërheqjes së investimeve të huaja. Dy elemente të rëndësishme për këtë gjë janë ulja e perceptimit të korrupsionit dhe përmirësimi i gjendjes reale të korrupsionit, për të cilën gjë tashmë kemi biseduar, si dhe përforcimi i kapaciteteve të gjyqësorit. Nëse je investitor, ke nevojë ta dish se në rast të kontestit me dikë, mund t’i drejtohesh gjykatës dhe ta zgjidhësh këtë kontest në mënyrë të shpejtë dhe të drejtë. SHBA-ja ka bashkëpunuar me institucionet e Kosovës, shoqërinë civile dhe bizneset e vogla për të arritur përparim në këtë aspekt, përmes programit të USAID-it për përmirësimin e afarizmit. Kolegët e USAID dhe të Departamentit të Drejtësisë janë po ashtu duke punuar me gjykatat për përmirësimin e transparencës dhe përforcimin e kapaciteteve. Pak kohë më parë kam vizituar një projekt të serrave në Kosovën veriore të mbështetur nga USAID, që është duke i kontribuar produktivitetit ekonomik, si dhe punësimit. Jemi duke punuar me ndërmarrje të sektorëve të ndryshëm, si me ato të përpunimit të drurit apo për prodhimin e kaldave me pelet -biznese që nuk kam ditur se ekzistojnë – për të ndihmuar në inkurajimin e mundësive për punësim. Më herët kam përmendur fondin garantues për kredi, por më lejoni t’ju them diçka më shumë për të. Ky fond është mbështetur dhe dizajnuar nga USAID-i, por edhe donatorët tjerë janë duke dhënë para. Është fond garantues, që mund të ndihmojë në grumbullimin e 400 milion eurove në formë të huadhënies për ndërmarrjet e vogla dhe të mesme. Shpresojmë të krijojmë 20.000 vende pune gjatë gjashtë viteve të ardhshme. Për zbatimin e këtij programi është e domosdoshme që Kuvendi i Kosovës ta miratojë ligjin relevant sa më shpejt të jetë e mundur, në mënyrë që të vihen në funksion 18 milionë eurot e donatorëve për të krijuar fondin gjatë këtij viti. Ky është problem i madh, ne po mundohemi të ndihmojmë, por është problem i madh.
KD: Është e sigurtë se do të jetë problem për të ardhmen e afërt sepse këto gjëra duket se marrin kohë këtu. Ju faleminderit për intervistën.
Delawie: Ju faleminderit juve.
