RTK: Zonja Jacobson, ju faleminderit për këtë intervistë.
Jacobson: Ju faleminderit juve!
RTK: Do të largoheni nga Kosova brenda pak ditëve. Cilat janë përshtypjet tuaja?
Jacobson: Më duhet të them se kanë qenë tri vite të mrekullueshme. Kam ardhë këtu si optimiste dhe po largohem si optimiste. Me siguri këto kanë qenë tri vitet më të ngarkuara me punë në karrierën time, por mendoj se bashkërisht me ekipin tonë në ambasadën amerikane, do të thoja se i kemi pasur tri vite shumë produktive në mbështetje të Kosovës në rrugën e saj drejt Evropës. Pra, ka shumë të arritura me të cilat krenohemi, duke përfshirë edhe dialogun ndërmjet Kosovës dhe Serbisë, zgjedhjet e lira dhe të drejta, integrimi i policisë, si dhe jemi krenarë me disa të arritura në ambasadë, si fillimi i punës për ndërtesën e re të ambasadës, ardhja e vullnetarëve të Korpusit të Paqes në Kosovë, fillimi i shërbimeve konsullore. Natyrisht, gjithmonë mbetet ende punë për të bërë. Gjithmonë ndodh ashtu. Po shpresoj, përderisa po largohem nga Kosova dhe përderisa vazhdoj ta përcjelli gjendjen në javët e ardhshme që do të shohim përparim në disa prej çështjeve të mbetura lidhur me dialogun, si dhe me Gjykatën Speciale. Por, në përgjithësi përshtypjet e mia janë se ky është vend i ri e dinamik, shumë mikpritës dhe me të vërtetë më vjen mirë që kam pasur rastin t’i kaloj këto tri vite në Kosovë.
RTK: Thatë që ka pasur shumë ngjarje gjatë këtyre tri viteve. Cilat prej tyre do t’i veçonit?
Jacobson: Është vështirë që t’i veçoj vetëm tri, por do të thoja ditëlindja ime vitin e shkuar. Jo për shkak të ditëlindjes, por për arsye se kjo ishte dita kur erdhën vullnetarët e parë të Korpusit të Paqes dhe po ashtu, kjo ishte dita kur u mbajtën zgjedhjet nacionale, të cilat për herë të parë ishin të lira dhe të drejta dhe që përfshinë edhe veriun. Pra, kjo ishte diçka e madhe në mes të mandatit tim. Në fillim të mandatit natyrisht e kemi pasur përmbylljen e mbikëqyrjes së pavarësisë, kurse në fund me siguri më duhet ta veçoj vënien e gurthemelit për ndërtesën e re të ambasadës, sepse mendoj se kjo nënkupton që po e lë një simbol të partneritetit të qëndrueshëm dhe të miqësisë së qëndrueshme ndërmjet Kosovës dhe Shteteve të Bashkuara të Amerikës.
RTK: E përmendët se këto kanë qenë ngjarjet pozitive dhe që keni ardhë optimiste dhe po largoheni si optimiste, por cilat kanë qenë ditët më të vështira gjatë mandatit tuaj këtu?
Jacobson: Koha më e vështirë me siguri ka qenë periudha prej gjashtë muajsh që i mori formimi i qeverisë pas zgjedhjeve të fundit. Shumë njerëz i kishin drejtuar sytë kah ambasada amerikane për të dalë me ndonjë zgjidhje apo për të mundësuar ndonjë mënyrë të bisedimeve, por përnjëmend nuk konsideroja që ky ishte roli ynë. Prandaj, përderisa kam mbajtur lidhje shumë të mira të komunikimit me të gjithë udhëheqësit politikë, kurrë s’ka qenë puna jonë që t’iu sygjerojmë se si duhet të vijojnë më tej apo si ta formojnë koalicionin. Vetëm i kemi dëgjuar dhe iu kemi kërkuar atyre që të vazhdojnë të flasin me njëri-tjetrin dhe që t’i shfrytëzojnë institucionet e Kosovës, Gjykatën Kushtetuese, Presidencën. Por, kjo ishte e vështirë sepse kjo do të thotë që i kemi humbur gjashtë muaj kohë. I kemi humbur gjashtë muaj sa i përket zhvillimit ekonomik dhe mendoj se kemi parë ulje të vërtetë të investimeve të huaja në Kosovë për këtë arsye. Po ashtu, kemi humbur kohë edhe në çështjet e dialogut. Pra, me siguri kjo ka qenë periudha më e vështirë, por mendoj se tashmë e kemi tejkaluar këtë.
RTK: A mund të na thoni diçka për bashkëpunimin tuaj me institucionet e Kosovës, si me qeverinë, presidencën dhe me kuvendin?
Jacobson: Bashkëpunimi ka qenë me të vërtetë i shkëlqyeshëm, njëmend i jashtëzakonshëm me të gjitha institucionet e Kosovës. Ka qenë kënaqësi për të punuar në një vend ku kam qasje të menjëhershme te udhëheqësia dhe ku ata kanë qasje të menjëhershme te unë. Mund të flasim lirshëm me njëri-tjetrin, madje edhe troç me njëri-tjetrin, mund të jap këshilla, nganjëherë ato këshilla pranohen, por edhe mund të marr këshilla nga ta. Angazhimi me institucione përbën pjesë të punës sime dhe më duhet të them se ka qenë privilegj dhe kënaqësi. Kjo është e vërtetë pa marrë parasysh a po flasim për Presidenten, për të cilën kam respekt të madh, për qeverinë, e cila i ka marrë disa vendime të vështira apo për Kuvendin e Kosovës, ku kam qenë vizitore e shpeshtë.
RTK: Sa herë që vendi gjendet në situatë të vështirë, pothuajse të gjithë, qytetarët dhe partitë politike shikojnë kah ju. Çka mendoni për këtë?
Jacobson: Kjo është për të qeshur dhe shpresoj se këtë gjë po e shohim më pak tash se sa para tri viteve sepse me të vërtetë është me rëndësi që pas përmbylljes së mbikëqyrjes së pavarësisë, pas zgjedhjeve të lira dhe të drejta, vetë institucionet e Kosovës ta marrin përgjegjësinë për fatin e vendit. Shtetet e Bashkuara të Amerikës gjithmonë do të jenë mike të Kosovës; jemi të lumtur që t’i japim këshillat dhe sygjerimet më të mira – kur diçka e tillë kërkohet nga ne – por, iu takon zyrtarëve të zgjedhur të Kosovës që t’i marrin vendimet tash e tutje. Jemi munduar që të mos përzihemi shumë në hollësitë e përditshme dhe vendimet për personel të qeverisë, por të përpiqemi dhe t’i kushtojmë vëmendje atyre çështjeve, si p.sh. Gjykata Speciale, që me t’i vërtetë i konsiderojmë thelbësore për partneritetin tonë me Kosovën dhe për suksesin e Kosovës, në të cilën kemi investuar shumë.
RTK: Cili është vlerësimi juaj për punën dhe funksionimin e partive politike opozitare në Kosovë? Kemi tri partitë opozitare këtu, Lëvizjen Vetëvendosje, AAK-në dhe Nismën. Përse nuk jeni takuar asnjëherë me udhëheqësit e Vetëvendosjes?
Jacobson: Mendoj se në çdo demokraci është me rëndësi që të ketë opozitë të përgjegjshme, e cila i kërkon llogari qeverisë dhe e cila tërheq vëmendjen për problemet e ndryshme dhe ndihmon në shprehjen e mendimeve dhe dëshirave të popullit që i ka zgjedhur në Kuvend. Unë shpresoj që në të ardhmen partitë opozitare do ta marrin më shumë parasysh gjendjen e përgjithshme të vendit dhe drejtimin e përgjithshëm që vendi e merr për shumicën e çështjeve strategjike, siç është Gjykata Speciale, dialogu, se sa që të përpiqen që të fitojnë pikë politike në kurriz të qeverisë. Sa i përket Vetëvendosjes, jam takuar me zyrtarë të ndryshëm të Vetëvendosjes në ngjarje të ndryshe. Shpend Ahemti, në cilësinë e tij si kryetar i komunës ka marrë pjesë në pritjen me rastin e Ditës sonë të Pavarësisë javën e kaluar, si dhe në ceremoninë për vënien e gurthemelit, por ekziston një arsye e posaçme pse nuk takohem me ta si parti politike: përdorimi i taktikave të dhunshme nga ana e tyre. Nuk e mendoj se është politikisht legjitime apo e përgjegjshme për përdorimin e taktikave të dhunshme, p.sh. dhuna që e kemi parë në demonstratat e organizuara më herët gjatë këtij viti, në të cilat u lënduan me dhjetëra policë, si dhe u shkaktuan dëme prej milionave. Pati edhe protestues të lënduar, natyrisht, por kjo ishte plotësisht e domosdoshme. Kjo nuk bëri që Kosova të dukej mirë në skenën botërore dhe mendoj se me të vërtetë pengoi përparimin e vendit. Prandaj, iu kam thënë Vetëvendosjes gjatë tërë kohës, krejt çka duhet të bëjnë që të takohem me ta është që të heqin dorë nga taktikat e dhunshme si mjet politik. Më vjen keq që nuk e kanë bërë këtë, ndoshta do ta bëjnë këtë kur të vijë ambasadori i ardhshëm.
RTK: A keni ndërhyrë për ta zgjidhur ngërçin politik në Kosovë dhe cili është mendimi juaj për të?
Jacobson: Jo, nuk kam pasur fare interesim që të ndërhyj në politikat partiake. Nuk kam pasur fare interesim që të përzihem në politikën e brendshme partiake; nuk kam pasur fare interesim që të diktoj ose të sygjeroj ndonjë zgjidhje rreth mënyrës se si duhej të formohej koalicioni. Për çfarëdo arsye, dukej se njerëzit ishin më të qetë kur nganjëherë isha edhe unë në të njëjtën zyrë me ta, edhepse përpiqesha ta shmangia një gjë të tillë. Nuk mund t’ju them se sa herë iu kam thënë udhëheqësve politikë: “Ju lutem, nëse dëshironi të bisedoni, shkoni në zyrën e Presidentes”. Ata më thonin: “A s’mund t’na ftosh për kafe”? Në çka përgjigjesha: “Te Presidentja ka kafe shumë të mirë”. Në fund, pasi që z. Thaçi dhe z. Mustafa vendosën ta formojnë koalicionin bashkërisht, ata kërkuan që të isha e pranishme kur ta njoftonin Presidenten për këtë dhe me ftesë të Presidentes, pata rastin të merrja pjesë në atë takim, por ky nuk ishte takimi ku koalicioni u vendos, por ishte takimi ku ata ia shpjeguan Presidentes se çka mëtonin të bënin. Do të kisha qenë më e lumtur po të mos kisha qenë as në atë takim, sepse nuk ishte marrëveshja ime, por nëse me praninë time, jo me ndikimin tim, ndihmova për t’i shtyrë gjërat përpara, atëherë me kënaqësi mora pjesë në takim. Mendoj se ndërhyrja e vetme ishte gjatë intervistës tashmë në zë në Fol kur i nxita të gjithë udhëheqësit politikë, jo njërin apo tjetrin, por të gjithë udhëheqësit politikë – do ta them më sjellshëm këtë herë – që të mendojnë për të ardhmen e vendit dhe të ecin përpara.
RTK: Si e vlerësoni rolin e komunitetit serb në Kosovë?
Jacobson: Mendoj se komuniteti serb luan rol të rëndësishëm këtu, si sa i përket kushtetutës dhe ligjeve të Kosovës, po ashtu edhe për tu siguruar që personat nga të gjitha komunitetet e ndryshme etnike e ndjejnë që Kosova është shtëpia e tyre, që janë të sigurtë këtu, që kanë të ardhme këtu dhe që kanë qasje të barabartë në shërbimet qeveritare. Njëra prej gjërave më të mira që ka ndodhur gjatë kohës sime këtu ishte mbajtja e zgjedhjeve lokale dhe të përgjithshme, gjatë të cilave serbët dhe të tjerët në veri të Kosovës votuan për herë të parë në zgjedhjet e Kosovës të mbajtura me ligjet e Kosovës. Me to dërguan deputetët në Kuvendin e Kosovës, si dhe tani kemi individë nga veriu në qeveri dhe është me rëndësi që pakicat etnike të kenë mënyra të ndryshme përmes të cilave dëgjohet zëri i tyre në institucionet qeveritare. Më mërzit fakti që Kosova ende nuk e ka përmbushur pragun prej 10% të përfshirjes së pakicave në institucionet publike. Dhe do të dëshiroja më shumë njerëz nga pakicat në të gjitha institucionet publike, qofshin ato institucione qeveritare apo ndërmarrje publike ose madje edhe në nivel lokal.
RTK: Çka mendoni, a është kjo klasë politike e Kosovës e gatshme që t’i shtyjë proceset përpara?
Jacobson: Ky është gjykim që duhet ta marrin vetë votusit kosovarë.
RTK: Megjithatë, cili është mendimi juaj?
Jacobson: Mendimi im si diplomate amerikane, si diplomate e huaj është se është obligimi im që të punoj me personat që ju i zgjedhni e nuk është obligimi im që të përkufizoj se sa të fuqishëm janë ata apo sa të gatshëm janë për të ecur përpara. Por, do ta them se kam pasur bashkëpunim shumë të mirë me qeverinë e mëhershme, me qeverinë e tanishme mbi një varg çështjesh. Jam e sigurtë se kjo do të vazhdojë edhe kur të vijë ambasadori i ardhshëm.
RTK: Cili është mendimi juaj për punën e gjyqësorit dhe të prokurorisë në vendin tonë?
Jacobson: Qartazi kjo është fushë ku ende duhet punuar shumë. Kemi parë përparim gjatë kohës sa kam qenë këtu. Në veçanti e kam parë Policinë, e cila me ndihmën ndërkombëtare, përfshirë edhe nga Shtetet e Bashkuara, përnjëmend i ka rritur kapacitetet e veta. Po ashtu, edhe fakti që tani kemi strukturë të njësuar të policisë që punon edhe në veri i kontribuon shumë sundimit të ligjit. Po përparojmë edhe sa i përket integrimit të sistemit të drejtësisë, përmes punësimit të gjykatësve të ri nga veriu në pajtim me marrëveshjen e nënshkruar në muajin shkurt në Bruksel. Por, e dimë se ende ka probleme me lëndët e grumbulluara, me kërcënimet kundër gjyqtarëve dhe prokurorëve, të cilët janë të përfshirë në rastet më të vështira, si të krimit të organizuar dhe korrupsionit, dhe kjo është fushë ku të gjithë duhet të punojmë edhe më shumë. Qeveria ime do ta bëjë këtë, edhe qeveria juaj duhet ta bëjë atë, në veçanti meqenëse e presim tranzicionin e EULEX-it vitin e ardhshëm, kur vetë gjyqësori i Kosovës duhet të marrë gjithnjë e më shumë përgjegjësi mbi vete.
RTK: Të flasim pak për Gjykatën Speciale. Në një intervistë që e keni dhënë para dy javëve në RTK, keni thënë se nëse Gjykata nuk votohet, atëherë SHBA-ja nuk do ta pengojë Rusinë ta themelojë këtë Gjykatë në OKB. Çka mendoni tash kur dihet se deputetët e Kuvendit të Kosovës nuk votuan për Gjykatën?
Jacobson: Ende qëndron ajo që kam thënë herën e fundit kur isha në RTK. Kjo është plotësisht e vërtetë. U kemi thënë udhëheqësve politikë, ua kemi thënë deputetëve, e kemi thënë publikisht që nëse Kosova nuk e miraton Gjykatën Speciale, atëherë nuk do ta bllokojmë procesin në OKB. E një proces në OKB do të ishte i keq për Kosovën. Kongresmeni Engel ishte këtu javën e kaluar dhe e shpjegoi se ai nuk mendonte që Kosova do të trajtohej drejtësisht në OKB, dhe më duhet të them, duke marrë parasysh që OKB-ja nuk e pranon Kosovën, si dhe në Këshillin e Sigurimit të OKB-së ka edhe vende që nuk e pranojnë Kosovën, atëherë kjo do të ishte shumë e vështirë për Kosovën. Nuk do të ishte më fjala vetëm për 10 apo 12 aktakuza ndaj individëve, por do të flitej edhe nëse Kosova ka të drejtë të ekzistojë si shtet. E kjo është diçka që nuk do të duhej të argumentohej sërish. Por, kam frikë se kështu do të ndodhë nëse kjo çështje shkon në OKB. Qeveria më ka siguruar se mëton ta dërgojë sërish ligjin në Kuvend në të ardhmen e afërt. Shpresoj se kjo do të ndodhë dhe shpresoj se do të jetë e suksesshme përndryshe do të paguhet çmimi për të. Dhe edhe pse Kosova gjithmonë do të jetë vend mik, partnere e SHBA-së, ne jemi vend i ngarkuar me punë. Kemi shumë interesa nëpër botë. Madje edhe nga Byroja prej nga vij unë, Byroja për Çështje Evropiane, e kemi p.sh. Ukrainën për të cilën duhet të mendojmë. Ne kemi edhe sfida të tjera, të cilave duhet t’iu kushtojmë vëmendje dhe është e natyrshme që një pjesë e vëmendjes sonë, që e kemi pasur ndaj Kosovës, përfshirë edhe përkrahja e Task Forcës për hetime speciale, të humbasë. Do të humbasë për shkak të prioriteteve tjera, meqenëse Kosova nuk është në gjendje ta miratojë Gjykatën Speciale.
RTK: Por, tri partitë opozitare në Kuvend e kanë thënë sërish se nuk do të votojnë për themelimin e Gjykatës Speciale dhe nëse kjo çështje riprocedohet në Kuvendin e Kosovës, atëherë nuk po respektohen kushtetuta dhe ligjet e Kosovës.
Jacobson: Është e rëndomtë që parlamentet nëpër botë t’i riprocedojnë ligjet. P.sh. Ne në Shtetet e Bashkuara sapo e kemi bërë këtë me ligjin për tregti. Nganjëherë, ndonjë ligj nuk kalon me sukses për herë të parë dhe atëherë del në votim për herë të dytë. Prandaj, nga sa kemi kuptuar nga ekspertët tanë ligjorë është se nuk ka ndonjë pengesë në ligj apo kushtetutë për riprocedimin e ndonjë amandamenti kushtetues ose të ndonjë statuti, i cili nuk ka kaluar më parë.
RTK: Të flasim pak edhe për luftën kundër terrorizmit. Kosova ka marrë shumë lëvdata nga shumë mekanizma ndërkombëtarë për luftën kundër terrorizmit. Cili është vlerësimi juaj rreth kësaj?
Jacobson: Kjo është çështje me rëndësi, jo vetëm për Kosovën, por për të gjithë në Evropë dhe në Shtetet e Bashkuara, por edhe për tërë botën. Kam qenë shumë e lumtur dhe e kënaqur nga puna që Qeveria e Kosovës e ka bërë, veçanërisht gjatë vitit të kaluar duke e miratuar Ligjin për ndalimin e bashkimit në konflikte të armatosura jashtë territorit të vendit, duke arrestuar luftëtarët që janë kthyer nga ato konflikte, duke arrestuar imamë radikalë dhe të tjerë që rekrutonin njerëz për të luftuar në Siri dhe Irak, si dhe duke u përpjekur për t’i shpërndarë mesazhet e kundërta. Mendoj se po shohim më pak njerëz duke shkuar atje, sepse tashmë ata e kuptojnë çka është në lojë. Po ashtu, e kuptojnë se edhe nëse dikush shkon me qëllimet më të mira në Siri, kur të mbërrijnë atje, ISIS-i më nuk i lejon të largohen. Më parë e ekzekutojnë dikë se sa që ta lejojnë të largohet nga aty. Mendoj se me disa prej pamjeve rrënqethëse që i kemi parë në televizor ose thirrjet që i kemi dëgjuar nga pjesëtarët e ISIS-it, përfshirë edhe nga ata nga Kosova, për të organizuar sulme në Ballkan, mendoj se kjo ka bërë që njerëzit këtu vërtetë … kjo nuk përfaqëson mënyrën se si ndjehen shumica e kosovarëve, dhe mendoj se vitin e kaluar kemi parë shtim të njëmendtë të ndërgjegjësimit nga shoqëria në tërësi për nevojën për ta luftuar ekstremizmin. Pra, e mirëpres që qeveria ndoshta muajin e ardhshëm do të dalë me strategjinë e gjerë dhe gjithëpërfshirëse për luftimin e ekstremizmit të dhunshëm, jo vetëm nga aspekti i organeve të zbatimit të ligjit, por edhe nga aspekti i edukimit, i mesazheve, ana socio-ekonomike. Pra, është problem i gjerë që kërkon një seri të gjerë të zgjidhjeve. Besoj që qeveria po punon për këtë.
RTK: Cili është mendimi juaj rreth marrëdhënieve të Kosovës me vendet fqinje? A po tregon Kosova gatishmëri për bashkëpunim të mirë fqinjësor?
Jacobson: Po, apsolutisht. Dialogu me Serbinë është tregues shumë i mirë për këtë. Nëse kthehem dhe mendoj për kohën kur kam ardhë në Kosovë në gusht 2012, askush atëherë s’do të kishte ëndërruar që kryeministrat do të takoheshin 25-30 herë; që ministrat nga të dy vendet vijnë e shkojnë andej-këtej për tu këshilluar për çështjet e interesit të përbashkët, p.sh. për integrimin evropian, për bashkëpunimin në zbatimin e ligjit, për çështjet e drejtësisë. Prandaj, mendoj se tërë kjo është tepër pozitive. Natyrisht, duhet të punohet ende. E kuptoj se ende ka punë sa i përket demarkacionit të kufirit me Malin e Zi dhe natyrisht, incidenti në Kumanovë kohëve të fundit ka nxitur organet e zbatimit të ligjit të Kosovës dhe ato të Maqedonisë që të punojnë më për së afërmi për tu përpjekur për t’i ndaluar përsëritjen e incidenteve të tilla në të ardhmen. Kosova përfundimisht ka treguar vullnet, siç kanë treguar edhe vendet e tjera në rajon. Të gjitha shtetet e rajonit e shohin të ardhmen e tyre në Evropë e që kjo të ndodhë, vendet e rajonit duhet të bashkëpunojnë: politikisht, ekonomikisht, por edhe këtu ende ka punë. Megjithatë, mendoj se është arritur përparim.
RTK: Si e shihni rolin e shoqërisë civile dhe medieve në Kosovë?
Jacobson: Mendoj se shoqëria civile dhe mediet luajnë rol shumë të rëndësishëm në çdo demokraci, por posaçërisht këtu në Kosovë, që është vend i ri me sfida të shumta e të ndryshme. Mediet dhe shoqëria civile do të duhej t’i kërkojnë qeverisë llogaridhënie për vendimet që i merr; do të duhej t’iu ndihmojnë njerëzve për t’i kuptuar më mirë gjërat; do të duhej të ndihmonin dialogun ndërmjet popullatës si tërësi dhe qeverisë; dhe shpresoj që shoqëria civile dhe mediet do të jenë në gjendje që të bëjnë më shumë rreth korrupsionit, të cilën e konsideroj si kërcënimin më të madh për qëndrueshmërinë afatgjatë të Kosovës si vend i suksesshëm dhe i begatshëm. Në këtë vend ende është kultura e korrupsionit dhe nuk më vjen turp ta them këtë pa marrë parasysh a po flasim për korrupsionin në prokurimin publik, në vendet e punës apo në çfarëdo fushe tjetër, prandaj mendoj se kjo është fushë në të cilën qeveria dhe bashkësia ndërkombëtare, si dhe shoqëria civile dhe mediet duhet të punojnë edhe më shumë në të ardhmen.
RTK: Edhe dy pyetje para se ta mbyllim intervistën. Si e shihni të ardhmen e Kosovës?
Jacobson: E dini, nuk dëshiroj të bëj parashikime, por siç e thashë, Kosova duket se është në rrugë të duhur për shumicën e gjërave, duket që është shumë vend dinamik. Jam e mahnitur se sa shumë kanë arritur populli dhe qeveria e Kosovës gjatë tri viteve që kam qenë këtu dhe me një popullatë të re e të gjallërishme, përfshirë edhe ata që i kemi dërguar në Shtetet e Bashkuara për arsimim, përderisa kthehen dhe bëjnë që t’iu dëgjohet zëri, mendoj se Kosova ka të ardhme të ndritur.
RTK: Pyetja e fundit. Do të largoheni nga Kosova pas disa ditëve. Cila do të jetë pozita juaj e ardhshme?
Jacobson: Do të punoj në Uashington, në selinë qendrore të Departamentit të Shtetit dhe në njëfarë mënyre po kthehem në shtëpi. Do të punoj në Byronë për organizata ndërkombëtare që merret me Kombet e Bashkuara dhe me organizatat e tjera ndërkombëtare dhe do të jem zëvendëse kryesore e asistentit të sekretarit të shtetit, që në thelb nënkupton se do të jem personi numër dy në atë zyrë. Shpresoj fuqimisht se nuk do të punoj në çështjen e një Tribunali të OKB-së për Kosovën, por më parë në çështjet si anëtarësia e Kosovës në UNESCO dhe organizatat e tjera ndërkombëtare.
RTK: Zonja Ambasadore, ju faleminderit shumë për kohën tuaj.
Jacobson: Ju faleminderit për mundësinë.
